अत्तरिया - कैलालीको गोदावरी नगरपालिका वडा नं १२ को सिममा पहिरोले ३ परिवार पूर्ण रुपमा बिस्थापित भएका छन् । गएको साउन १४ गते राति अबिरल बर्षासंगै आएको पहिरोले सिम गाउँका ३ परिवार पूर्ण रुपमा विस्थापित भएको स्थानियबासी पदम कार्कीले जानकारी दिए ।
स्थानिय नन्दलाल कार्की ,डम्बर बहादुर कार्की र रमेश धामीको घरखेत सबै पहिरोले क्षति गरेपछि अहिले उनीहरु अर्काको घरमा बसेर दैनिक कटाइरहेका छन् । यो संगै २८ घरपरिवार उच्च जोखिममा रहेको स्थानिय पदम कार्कीले गोदावरी न्युजलाई बताए ।
'१४ गते रातिभरी ठूलो पानी आयो र जमिन चिराचिरा भयो , दोस्रो दिनदेखी लगातार रुपमा पहिरो जान थालेपछि ३ परिवारको घर गोठ सबै भत्काएर पूर्ण रुपमा बिस्थापित भए' उनले भने - 'अझै जमिनमा चिरा परेकाले गाउँमा रहेका २८ परिवार उच्च जोखिममा रहेका छन् ।'
यो संगै पहिरोले गर्दा खानेपानीको पाईपलाईन पुरिदा खानेपानी समेत अबरुद्ध भएको छ । सिम खानेपानी उपभोक्ता तथा सरसफाई समितिको ८०० मटिर पाईपलाई पहिरोले पुरिदा स्थानियहरु अहिले दुषित पानी पिउन बाध्य रहेको कार्कीले बताए । पहिरो गएको डेढ महिना बितिसक्दा पनि पिडितले अहिले सम्म कहिकतैवाट राहत नपाएको गुनासो पोखका छन् ।
वडाका जनप्रतिनिधि र प्रहरीले अनुगमन गरेपनि अहिलेसम्म पनि पिडित परिवारले कहिकतैवाट राहत नपाएको र जोखिममा रहेका परिवारहरुका लागि पनि कसैले केही नसोचेको उनको भनाई छ । गोदावरी नगरपालिकाका जनप्रतिनिधिहरुको उदाशिनताका कारण आफुहरुले आधारभूत आवश्यकतावाट पनि बञ्चित हुनुपरेको गोदावरी १२ का अर्का स्थानिय दिल बहादुर बुढाथोकीले बताए ।
गाउँ गाउँमा जनप्रतिनिधिहरु आएको ३ बर्ष पुग्दा पनि आफ्ना समस्याहरु जस्तोको त्यस्तै रहेको उनको भनाई छ । 'सबै भन्दा पहिलो समस्या त बाटोको छ , बाटोले गर्दा निकै बिजोक भएको छ , बर्षातको ३ , ४ महिना त बाटो नै बन्द हुन्छ' उनले भने - 'बर्षात रोकिएपछि कात्तिक देखि फेरि सफाइ हुन्छ र जेठ सम्म गाडि चल्छ ।' उनले बाटोको दिर्धकालिन समाधान हुन जरुरी रहेको बताए ।
उता गोदावरी १२ का वडा अध्यक्ष भिम बहादुर खड्काले पहिरो गएको ठाउँमा प्रहरी प्रशासन सहित वडावाट अनुगमन गरेको बताए । उनले पहिरो पिडित र जोखिममा रहेकाहरुकोका लागि नगरपालिकासंग सहकार्य गरेर राहत र अन्य ब्यबस्थापनको लागि छलफल भैरहेको बताए । सुदूरपश्चिम प्रदेश सरकारले प्रदेशको स्थायी राजधानी तोकेको गोदावरी नगरपालिकाका वडा नं १२ निकै बिकट रहेको छ ।
त्यहाँको चाप , सल्ली , सिम लगाएतका गाउँका स्थानियहरु अहिले पनि कष्टकर जिवनयापन गरिरहेका छन् । बाटोघाटोको अभाव हुदा स्थानियहरुलाई बर्षातको बेला बजारसम्म आवतजावत गर्दा निकै समस्या हुने गरेको छ भने , त्यहाँका स्थानियहरुले शिक्षा , स्वास्थ्य , बिजुलीबत्ती , खानेपानी लगाएतको आधारभूत आवश्यकताको पनि अभाव झेलिरहेका छन् ।
