नवराज विक हत्या प्रकरणका दोषीलाई कारबाहीको माग गर्दै कैलालीको बौनियामा प्रदर्शन

समाज

गृहपृष्ठ
समाज
नवराज विक हत्या प्रकरणका दोषीलाई कारबाहीको माग गर्दै कैलालीको बौनियामा प्रदर्शन

नवराज विक हत्या प्रकरणका दोषीलाई कारबाहीको माग गर्दै कैलालीको बौनियामा प्रदर्शन

घटनाका दोषीलाई कारबाही नभए आन्दोलन चर्काउने चेतावनी

बुधबार, जेठ १४, २०७७ गोदावरी न्युज

कैलाली – कैलालीको बर्दगोरिया गाउँपालिकामा दलित एकता मञ्चले रुकुमको चौरजहारीमा भएको नवराज विकको हत्या प्रकरण घटनाका दोषीलाई कडा कारबाही गर्नुपर्ने भन्दै विरोध प्रदर्शन गरेको छ । यस गाउँपालिकामा रहेका दलित अगुवा, दलित समुदायका युवाहरु लगायतको उपस्थितिमा नारा जुलुस सहित सामाजिक दूरी कायम गर्दै सो गाउँपालिकाको बौनिया बजारक्षेत्रमा प्रदर्शन गरिएको हो ।

कार्यक्रममा बोल्दै दलित एकता मञ्चका अध्यक्ष पुस्कर सुनारले नेपालको संविधानमा जातीय विभेद गर्न नमिल्ने व्यवस्था गरिएको भएपनि व्यवहारमा संविधान लागू नगरिएको प्रति आपत्ति जनाए । उनले संविधानमा भएको व्यवस्था व्यवहारमा कार्यान्वयन गर्नुपर्नेमा जोड दिए ।

कार्यक्रममा नेकपा कैलाली जिल्ला सदस्य एवं बौनिया बजार व्यवस्थापन समितिका अध्यक्ष रुपक सुनारले वर्तमान समयमा विश्वव्यापी कोरोना भाइरसको महामारी विरुद्ध संसारका मानिसहरु लडिरहेका बेला नेपालमा जातीय छुवाछुत विरुद्ध लड्नुपर्ने दुःखद अवस्था रहेको बताए । उनले दलित समुदाय नेपालमा लामो समय देखी जातीय विभेद खेपिरहेको बताउँदै न्यायका लागि सम्पूर्ण दलित समुदाय एकजुट भएर बुलन्द आवाज उठाउनु पर्नेमा जोड दिए । नवराज विकको हत्यारालाई कारबाही नभए लकडाउन उल्लंघन गरेर प्रदर्शन् गरिने पनि उनले चेतावनी दिए ।
त्यस्तै बर्दगोरिया गाउँपालिका कांग्रेस प्रतिनीधि एवं दलित अगुवा टेक बहादुर विकले दलित अगुवाहरुले विभिन्न पार्टीमा आस्था राखेका भएपनि दलित समुदायलाई न्याय दिलाउने कार्यमा एकजुट हुनुपर्ने आवश्यकता औंल्याए ।

युवा नेतृ बालकुमारी विकले रुकुम जिल्लामा दलित समुदायका नवराज विकको हत्यारालाई कडा कार्वाही नभए यस भन्दा सशक्त आन्दोलनमा उत्रिने चेतावनी दिइन् ।

प्रदर्शनमा सहभागीहरुले जातीय हत्या हिंसा बन्द गर, हत्यारालाई फँसी दे, कथित जातीय ब्राह्मणवाद मुर्दावाद, दलित एकता जिन्दावाद लगायतका नारा लगाएका थिए । यही जेठ १० गते रुकुमको चौरजहारीमा एक मल्ल थरकी गैह्रदलित केटीलाई विक थरको दलित केटाले प्रेम गरेर विहे गर्न खोजेको भन्दै कुटपिट गरी हत्या भएकोे थियो ।

प्रकाशित मिति: बुधबार, जेठ १४, २०७७ १२:३३