मातृभूमि जागरण अभियानका अभियन्ता भीम रावल एमालेले पार्टीबाट निष्कासित गरेपछि पहिलोपटक सुदूरपश्चिम पुगेका छन् ।
उनी शुक्रबार बिहान कैलालीको धनगढी पुगेका छन् । धनगढी विमानस्थलमा उनी निकटहरूले स्वागत गरेका छन् ।
सो क्रममा प्रधानमन्त्री तथा एमाले अध्यक्ष केपी शर्मा ओलीविरुद्ध नारावाजीसमेत गरेका थिए ।
काठमाडाैंबाट धनगढीसम्म एमाले नेता कर्ण थापा र नेता रावलसँगै सिटमा बसेर पुगेका छन् ।
नेता रावलले आफ्नो नेतृत्वमा पार्टी स्थापना गर्दै छन् । बिहीबार मात्र उनले पार्टीको नाम र अवधारणापत्र सार्वजनिक गरेका थिए । उनको पार्टीको नाम मातृभूमि जागरण अभियान नेपाल रहनेछ ।
धनगढी एअरपोर्ट मा पूर्वगृहमन्त्री समेत रहेका रावललाई पत्रकारहरुले बालेनसँग पनि छलफल गरेको चर्चाबारे सोधेका थिए ।
सो जिज्ञासामा रावलले भने, ‘बालेनजी हुनुहुन्छ, जोजो हुनुहुन्छ, ती सबलाई एकजुट गरेर राष्ट्रको हितमा अगाडि बढाएदेखि राम्रो हुन्थ्यो भने धारणा छ ।’
रावलले ठूला राजनीतिक दल गन्तव्यहीन, आदर्शहीन र सिद्धान्तहीन भएको आरोप लगाउँदै राष्ट्र र राष्ट्रियता जोगाउन सबै एक हुनुपर्ने धारणा राखे ।
‘देश र जनताका लागि जोजो छन्, इमान्दार देशभक्तहरु हामी एक ठाउँमा आउँछौं भन्नेमा मेरो विश्वास छ,’ उनले भने ।
