राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछाने धनगढी पुगेका छन । पार्टीको प्रदेश स्तरिय प्रशिक्षण कार्यक्रमलाई सम्बोधन गर्न उनी धनगढी आएका हुन ।
धनगढी पुगेर उनले सहकारी बारे संसदीय छानविन समितिले सत्यतथ्य बाहिर ल्याउनेमा आफू आशावादी रहेको बताएका छन । ‘धेरै व्यक्ति लाखौं सहकारीपीडितको न्यायका लागि भन्दा पनि रवि लामिछानेलाई दोषी देखाउन केन्द्रित भएका छन्,’ उनले भने, ‘त्यसको मूल्यांकन इतिहासले गर्नेछ । तर, पीडितले न्याय पाउनेमा म आशावादी छु ।’
गलत ढंगले सहकारीको रकम गोर्खा मिडियामा ल्याउन आफू संलग्न नभएको उनको दाबी छ । ‘मेरो संलग्नता भएको रहेछ भने त मैले तिर्नुपर्छ,’ उनले भने, ‘मैले कहाँ तिर्न जाने भन्नुपर्यो । म भएको समयमा बदमासी भयो र तेरो पनि जिम्मेवारी हो भन्ने एउटा तर्क होला । तर, अन्यले गरेको बदमासीको भारी मैले लिनुपर्ने होइन । त्यो म भएकै बेलामा बदमासी भए पनि त्यो बदमासी कसले र कसरी गर्यो भन्ने कुरा स्पष्ट छ ।’
अहिलेको सरकारको सुरुवाती छनक राम्रो नदेखिएको पनि लामिछानेको आरोप छ । ‘उहाँहरू (एमाले–कांग्रेस)ले हामी नै निर्विकल्प हौं भन्ने जुन सोच्नुभएको थियो, तर सुरुवाती छनक राम्रो देखिएको छैन,’ उनले भने, ‘तर, केही समय कुर्न अझै सकिन्छ र समय दिन कुर्नुपर्छ ।’ उनले पहिलेको सरकारले भ्रष्टाचार नियन्त्रणका लागि खोलेका फाइलबारे अहिले के भइरहेको छ भन्ने विषयमा आफूलाई जानकारी नभएको तर खबरदारी गरिरहेको बताए ।
