गृहमन्त्री रमेश लेखकले विधिको शासनलाई लागू गर्नु प्रहरीको पहिलो काम भएको बताएका छन ।
बुधबार प्रहरी प्रधान कार्यालयको स्थलगत अनुगमनपछि आयोजित कार्यक्रमलाई सम्बोधन गर्दै उनले संविधान र कानुनमा लेखेको कुरा आफैँ कार्यान्वयन नहुने बताए ।
“संविधानमा धेरै मौलिक हकका कुरा गरेका छौँ, राज्य र नागरिकका सम्बन्धका कुरा गरेका छौँ”, गृहमन्त्री लेखकले भने, “ती आफै परिचालित र क्रियाशील हुने होइनन् ।”
उनले लोकतन्त्रको आधारभूत मान्यता भनेको विधिको शासन भएको बताए । “लोकतन्त्र कुनै अमूर्त विषय होइन ” उहाँले भन्नुभयो,“नेताहरुले भाषण गर्ने र नागरिकले भाषण सुन्ने विषय मात्रै पनि होइन, लोकतन्त्रको आधारभूत मान्यता हुन्छन्, विधिको शासन पनि एउटा मान्यता हो ।”
उनले प्रहरीलाई निष्पक्षता, पारदर्शिता र व्यावसायिकतामा कमी हुन नदिन निर्देशन दिए ।
“उच्च मनोबलका साथ काम गर्नुहोला, प्रहरीको मनोबल उच्च राख्नको लागि र मनोबल उच्च रहिरहनका लागि प्रेरणादायी काम गर्न मन्त्रालयले गर्नेछ”, गृहमन्त्री लेखकले भने, “हामी त्यसमा प्रतिबद्ध छौँं ।” गृह प्रशासन आफ्ना लागि नयाँ अनुभव भए पनि संसदमा कानुन र संविधान निर्माणको क्षेत्रमा काम गर्ने अवसर लामो समयदेखि पाएको उनको भनाइ थियो ।
“ नेपाल प्रहरी इतिहास बोकेको गर्व गर्न लायक संस्था हो”, उनले भने ,“कानुनी व्यवस्था कायम गर्ने,अपराध नियन्त्रण गर्ने सवालका साथै मुलुक र समाजलाई न्यान दिने सवालमा प्रहरीको ठूलाे भूमिका छ ।”
सीमित स्रोतसाधन र जनशक्तिबीच प्रहरीले काम गरिरहेको जनाउँदै गृहमन्त्री लेखकले भने,“प्रहरी सङ्गठन थप सुदृढ र क्रियाशील बनाउन प्रहरी ऐन संशोधन आवश्यक छ।
उनले प्रहरीसम्बन्धी सबै कानुन समयसामयिक रुपमा पुनवराकोलन र संशोधन गर्न प्रहरी ऐन २०१२ लाई संसदमा पुर्याउने गतिमा अघि बढ्नेमा जोड दिए ।
कानुन बमोजिम काम गर्नुका साथै प्रहरीमा कुनै प्रकारको अवाञ्छित दबाब र प्रहरी संस्थाको दुरुपयोग गर्न नहुने उनको भनाइ छ ।
“मानिसले बिरामी परे डाक्टर र विपत् परे प्रहरीलाई सम्झिने गरेको” उहाँले भने ,“त्यस कारण प्रहरी समाजको डाक्टर पनि हो, किनभने दुःख पीडा र अप्ठ्यारोमा परेको मानिसले तपाईलाई सम्झिन्छ ।”
कार्यक्रममा गृह सचिव एकनारायण अर्याल र प्रहरी महानिरीक्षक वसन्तबहादुर कुवँरको उपस्थिति रहेको थियो ।
