डोटीबाट निर्बाचित सांसद प्रेम आलेले डोटीमा बजेट नहालेकोप्रति आक्रोश व्यक्त गरेका छन् । उनले ऊर्जामन्त्री शक्ति बस्नेतलाई पटक पटक भन्दा पनि बजेट नहालेको भन्दै आज संसदमा आक्रोस ब्यक्त गरे ।
'ऊर्जामन्त्रीलाई गत वर्ष पनि सेती नदी र गण्डिगाड खोलाले कटान गरेको बस्ती, विद्यालय जोखिममा छ । बजेटको व्यवस्थापन गर्नुपर्छ भनें । ऊर्जामन्त्रीले हुन्छ भन्नुभयो, तर बजेटमा परेन । मैले प्रधानमन्त्रीलाई पनि भनें बजेट परेर बस्ती जोखिममा छ भनेर । जग्गा कटान गरिसकेको छ, अब बस्तीमात्रै बाँकी छ । उहाँले हुन्छ भन्नुभयो । टिप्नुभयो, संशोधन भएन । यस पटक पनि ऊर्जामन्त्रीले गर्छु भन्नुभएको थियो, अहिले पनि परेन,आले ले भने । उनले थप भने,' डोटी जिल्लाको नाम किताबमै छैन । कतिपय सत्तापक्षका माननीयहरुकोमा बजेट परेको होला । म अनुरोध गर्न चाहन्छु, यो जाजरकोटमा बजेट कमै भएको रहेछ माननीय शक्ति बस्नेतकोमा । तपाईंहरुको कटौती गरेर पनि दिइदिनुस् । मन्त्री एउटा जिल्ला, पालिकामा मात्रै सीमित हुने ? मन्त्री सिंगो देशको होइन ? पटक पटक मन्त्री भएको मान्छेले सबैलाई समेट्न पर्दैन ? म ७० सालदेखि निरन्तर तीन पटक निर्वाचित भएर आएको छु।'
उनले डोटीमा डुबान भए नछोड्ने समेत चेतावनी दिए । 'डोटेली जनताले मलाई माया गरेर जिताइराख्नु भएको छ। तर माननीयज्यूले सुन्नुभएन । म खेद व्यक्त गर्न चाहन्छु । म ऊर्जामन्त्रीलाई भन्न चाहन्छु, तपाईं मन्त्री भइराख्नुस्, सधैं जाजरकोटमा बजेट लगिराख्नुस् । तपाईंलाई शुभकामना छ । त्यहाँको बस्ती डुबान भयो भने छोड्नेवाला छैन, खबरदार ! यदि बस्ती डुबान भयो, बगेर गयो, मानवीय क्षति भयो भने यही सदनमा बदला लिने अवस्था आउनसक्छ । डोटेली जनताले यो कुरा बोल भनेर मैले बोलिरहेको छु ,'उनले भने ।
