नेपाली कांग्रेसका सभापति शेरबहादुर देउवाले दासढुंगा प्रकरणबारे सत्यतथ्य किन बाहिर आएन भनेर एमालेका नेताहरुलाई प्रश्न गरेका छन्।एमालेले नेकपा स्थापनाको ७५ वर्ष पूरा भएको अवसरमा आयोजना गरेको हीरक महोत्सवमा बोल्दै उनले मदन भण्डारीको रहस्यमय दुर्घटनाबारे खोजबिन हुनुपर्ने बताएका हुन्।
‘मदन भण्डारीजस्तो व्यक्तित्वको बारेमा राम्रै कुरा गर्ने इच्छा थियो। अहिले आएर उहाँहरू (एमाले) ले कांग्रेसलाई गर्नुसम्म गाली गर्नुभयो। मैले जवाफ दिनुपरिहाल्यो। मलाई गाली गर्नेहरूले मदन भण्डारी किन मर्यो किन भन्न सक्दैन?,’ उनले भने, ‘मदन भण्डारी मारेको कुरा खोजबिन हुनुपर्यो, भण्डारीको रहस्मय घटनाको बारे छानबिन गर्न कसले रोकेको छ? कांग्रेसले रोकेको हो, कसले रोकेको छ?’
दुईपटक राष्ट्रपति हुँदा, पटकपटक प्रधानमन्त्री हुँदा भण्डारीको दुर्घटनाबारे पत्ता लगाउन नसकेको देउवाले बताए।
‘आफू खोज्न नसक्ने, कांग्रेसलाई गाली गर्ने, मदन भण्डारीको हत्यारा को हो? अहिलेसम्म पत्ता लगाउन सकेको छैन। हुँदाहुँदा उनको चालक पनि मारियो! कसले मार्यो पत्ता लागेको छैन! मदन भण्डारी राम्रो नेता हो, यसमा दुई मत छैन। उहाँको हत्याबारे अहिलेसम्म किन पत्ता लागेन? त्यसकारण कांग्रेसको विरोध गर्न सजिलो होला, गर्नुहोस् केही छैन। आफ्नो पनि कुरा भन्नु पर्यो नि!’
तत्कालीन एमालेका महासचिव भण्डारीको २०५० साल जेठ ३ गते चितवनको दासढुंगामा रहस्यमय दुर्घटनामा निधन भएको थियो।
