गोदावरी नगरपालिकामा निर्माणाधिन अत्याधुनिक फोहोरमैला व्यवस्थापन निर्माण कार्य अन्तिम चरणमा पुगेको छ।गोदावरी नगरपालिका–३ चौकीडाँडा सामुदायिक वन क्षेत्रमा फोहोरमैला व्यवस्थापन केन्द्रको निर्माण भईरहेको हो । ५ हेक्टर क्षेत्रफलमा फैलिएको उक्त फोहोरमैला व्यवस्थापन केन्द्र निर्माण स्थलमा १ हजार बढी रुखहरु काटिएका थिए ।
निर्माण कम्पनीका अनुसार भौतिक प्रगति ९० प्रतिशत पुगेको छ ।एशियाली विकास बैंकको ऋण सहयोगमा क्षेत्रीय सहरी विकास आयोजना कार्यालय धनगढीले फोहोरमैला व्यवस्थापन केन्द्र निर्माणका लागि चाइनाको सिचुवान प्रोभेन्सी जियोलोजिकल इन्जिनियरीङ कम्पलेक्ससंग १८ जुलाई २०२२ मा ठेक्का सम्झौता गरेको थियो ।
बुधबार बाट पोखरीमा जिओमेम्ब्रान सिट (फोहोर पानी जमिनमा भिज्न नदिने प्लाष्टिक) बिछ्याउने कार्य सुरु गरेको छ । भौतिक संरचना निर्माणको कार्य करिब अन्तिम चरणमा पुगिसकेको प्रोजेक्ट इन्जिनियर अशोक पाण्डेयले बताए । उनले भौतिक संरचना निर्माणको कार्य लगभग ९० प्रतिशत सकिईसकेको र अव आउने साउन भित्र भौतिक संरचना निर्माणको कार्य सम्पन्न हुने दावी गरे ।
फोहोर व्यवस्थापन केन्द्रमा कम्पाउण्ड, फोहोर फाल्ने ब्लक, फोहोर प्रशोधन यन्त्र लगायतका संरचनाहरु निर्माण सम्पन्न भईसकेको छ । फोहोरमैला व्यवस्थापन केन्द्रमा घरबाट फोहोर संकलन गर्ने देखि लिएर डिस्पोजल गर्ने, प्युरिफाई गर्ने र कुहिने फोहोरबाट मल बनाइने बताइएको छ । फोहोरमैला व्यवस्थापन केन्द्रबाट प्राङ्गारीक मल उत्पादन गरिने छ । परियोजनालाई ५० बर्ष सम्म प्रयोग गर्न मिल्ने गरि डिजाईन गरिएको छ ।
इन्जिनीयर पाण्डेयका अनुसार एक दिनको ठोसजन्य १३ टन र १३ घनमिटर दिसाजन्य फोहोर प्रोशोधन गर्ने क्षमता रहेको छ । फोहोरमैला व्यवस्थापन केन्द्रको निर्माणका लागि ५१ करोड ठेक्का भएको हो । यसमा ७५ प्रतिसत एडिवीको ऋण अनुदान सहयोग र २५ प्रतिशत नेपाल सरकारले सहयोग रहेको छ । सम्झौता अनुसार निर्माणको काम सेप्टेम्बर २०२४ मा सकिनुपर्नेछ ।
'२ बर्षमा निर्माण सक्ने गरी सम्झौता गरिएको फोहरमैला व्यवस्थापन केन्द्रको निर्माण सकिएपछि पनि ३ बर्ष भने निर्माण कम्पनीले नै संचालन गर्ने छ । ‘निर्माणको काम सकिएपछि ३ बर्ष अपरेशन मेन्टेनेन्सको काम हुने छ’ इन्जिनियर पाण्डेयले भने ‘उक्त कार्य निर्माण कम्पनिले नै गर्ने छ र त्यसपछि भने नगरपालिकालार्य हस्तान्तरण हुनेछ ।’
नगरपालिकालाई हस्तान्तरण गरेको १ बर्ष सम्म पनि मर्मत सम्भारको जिम्मेवारी निर्माण कम्पनीकै हुने छ । एशियाली विकास बैंकको ऋण अनुदान सहयोगमा कैलाली र कञ्चनपुरका गरी चारवटा स्थानीय तहमा हाल एकीकृत फोहरमैला व्यवस्थापन केन्द्र निर्माणको काम अगाडि बढेको हो ।
क्षेत्रीय सहरी विकास आयोजना अन्तर्गत कैलालीको धनगढी उपमहानगरपालिका, गोदावरी नगरपालिका, कञ्चनपुरको शुक्लाफाँटा नगरपालिका गरी तिनवटा नगरपालिकामा उक्त केन्द्र निर्माणको काम अघि बढेको छ । गोदावरी र शुक्लाफाँटा निर्माण कार्य अगाडि बढाए पनि धनगढी उपमहानर भिमदत्तले अझै पनि सुरु गर्न सकेको छैन् । भिमदत्तले नबनाउने भनिसकेको छ भने । धनगढीमा प्रक्रियामा रहेको जनाएको छ ।
