धनगढी - हरेक बर्ष झै यो बर्ष पनि मंसिर २२ गतेदेखि हुन लागेको सुदूरपश्चिम महोत्सवको तयारी शुरु भएको छ । कैलाली उद्योग वाणिज्य संघको आयोजनामा धनगढीमा हुने महोत्सवको तयारी शुरु भएको आज पत्रकार सम्मेलनको आयोजना गरि जानकारी दिइएको हो ।
अब हुने महोत्सव १७ औँ संस्करण रहेको संघका अध्यक्ष पुष्पराज कुँवरले जानकारी दिए । उनले यहि २२ देखि पुष २ गतेसम्म धनगढीमा महोत्सव हुने भएकाले तयारी तिव्र पारिएको बताए । उनले भने –‘महोत्सवको तयारीका लागि अध्यक्ष कुँवरको संयोजकत्वमा २९ वटा उपसमिति बनाइएको छ ।’
व्यवसायिक कृषि प्रर्दशनी, उद्योग व्यापारको प्रवद्र्धन तथा कला, संस्कृतिको संरक्षण एवंम् प्रवद्र्धनका लागि आयोजना हुने महोत्सवमा १० करोड बराबरको कारोबार हुने अनुमान गरिएको कुँवरले बताए ।
उद्योग वाणिज्य संघले दुई करोडको लगानीमा आयोजना गर्ने महोत्सवमा कृषि, जडिबुटी, हस्तकला, फर्निचर, अटोमोबाइल्स, गारमेन्ट, इलेक्टोनिकल, होटल र सूचना प्रविधि गरेर चार सय स्टल रहने वाणिज्य संघका वरिष्ठ उपाध्यक्ष पुष्कर ओझाले बताए ।
ओझाले स्थानीय उत्पादन र उद्यमशिलतालाई प्राथमिकता दियइएको महोत्सव करीब पाँच लाख जनाले प्रत्यक्ष रुपमा अवलोकन गर्ने अनुमान गरिएको बताए ।
महोत्सव अवलोकनका लागि विद्यार्थीलाई ५० रुपैयाँ, सर्वसाधारणलाई एक सय रुपैयाँ र फरक क्षमता भएका व्यक्तिलाई निःशुल्क प्रवेशको व्यवस्था मिलाइएको उद्योग वाणिज्य संघले जनाएको छ ।
संघका अध्यक्ष कुँवरले महोत्सवको उद्घाटनका लागि प्रधानमन्त्री पुष्पकमल दाहाल प्रचण्डलाई निमन्त्रणा गरिएकोको जानकारी दिए ।
