धनगढी -नेकपा एमाले सुदूरपश्मिच प्रदेश कमिटीले ‘समृद्धिका लागि संकल्प यात्रा’ को तयारी थालेको जनाएको छ । बिहिवार धनगढीमा पत्रकार सम्मेलन गरेर कार्यक्रम को बारेमा जानकारी दिएको हो । मंसिर १४ गतेबाट सुरु हुने यात्राको पूर्व तयारी र व्यवस्थापनका लागि प्रदेश कमिटीले आन्तरिक गृहकार्य सुरु गरेको सचिव रणबहादुर चन्द्रले पत्रकार सम्मेलनमा जानकारी गराए ।
बैतडीको झुलाघाट देखि पाँचथरको चिवा भन्ज्याङ सम्म नेकपा एमालेले पुष्पलाल मध्य पहाडी राजमार्गमा ‘समृद्धिका लागि संकल्प यात्रा’ सञ्चालन गर्ने भएको छ । तराइ, पहार र हिमाल जोड्ने, जनताका समस्यासँग एमाले जोडिने यात्राका रुपमा देशव्यापी अभियान सञ्चालन गर्न थालिएको प्रदेश अध्यक्ष कृष्ण प्रसाद जैशीले बताएका छन् ।
यात्राको तयारीका लागि प्रदेश कार्यालयमा पदाधिकारी बैठक बसेको छ । प्रदेश इन्चार्ज तथा पार्टी केन्द्रीय सचिव छवीलाल विश्वकर्मा र कर्णाली इन्चार्ज तथा केन्द्रीय सचिव लेखराज भट्ट सहीतको उपस्थितिमा तयारीका विषयमा छलफल गर्न बैठक बसेको हो ।
बैठकमा प्रदेश अध्यक्ष कृष्ण प्रसाद जैशी, उपाध्यक्ष कालीबहादुर शाही, सचिव रणबहादुर चन्द्र, उपसचिव भगीरथी विष्ट र नरबहादुर विश्वकर्मा सहभागि थिए ।
अवस्था अध्ययन तथा अन्य तयारी विषयमा छलफल गर्न पार्टी केन्द्रीय उपमहासचिव विष्णु रिमाल नेतृत्वको उच्च स्तरीय टोलीले समेत संभावित स्थलको अध्ययन यस अघि नै गरिसकेको छ ।
कार्यकर्ता परिचालन, केन्द्रीय नेतृत्वको टिम व्यवस्थापन, यात्रामा उठाउनु पर्ने विषय, जनतासँग जोडिन गर्नु पर्ने गतिविधी र जनतालाई एमालेको अभियानमा जोड्न आवश्यक गतिधिवी बारे बैठकमा छलफल गरिएको छ । साथै यो अभियान मार्फत पहाडी क्षेत्रमा पार्टी को सम्बन्ध मजुबत बनाउने एमाले को रणनीति रहेको छ ।
