कञ्चनपुर- शिक्षकहरु अनिश्चितकालीन विद्यालय बन्द गरेर आन्दोलमा उत्रिएका छन । कञ्चनपुरका सामुदायिक तथा संस्थागत सबै विद्यालयहरू आइतबारदेखि अनिश्चितकालका लागि बन्द गरेर शिक्षकहरू आन्दोलित भएका हुन । भीमदत्त नगरपालिका–१० स्थित सिद्धनाथ माध्यमिक विद्यालयका लेखापाल वीरेन्द्र जोशीमाथि एक साताअघि कुटपिट भएको घटनालाई लिएर सोमबार कञ्चनपुरका सबै शिक्षण संस्था बन्द गरेर जिल्लाभरीका शिक्षक आन्दोलित बनेका हुन ।
सोमबारदेखि जिल्लाभरका सामुदायिक तथा संस्थागत विद्यालयमा अनिश्चितकालीन पठनपाठन बन्द भएको छ । बन्दले विद्यार्थीको पढाई प्रभावित बनेको छ । आज (सोमबार) साँझसम्म माग सम्बोधन नभए थप आन्दोलनका कार्यक्रम तय गरिने जिल्लास्तरीय आन्दोलन परिचालन समितिले जनाएको छ।
प्रहरीको नियन्त्रणमै शिक्षक जोशीमाथि कुटपिट भएको घटनाको उच्चस्तरीय छानबिन टोली गठन गरी अनुसन्धान गर्नुपर्ने, जोशीलाई विद्यालय हाताभित्रबाट पक्राउ गरेर लैजाने प्रहरीलाई निलम्बित गरी कारबाही हुनुपर्ने, जोशीको उपचारमा लाग्ने सम्पूर्ण खर्च सरकारले व्यहोर्नु पर्ने लगायतका माग महासंघले अघि सारेको छ ।
गत साताको आइतबार सिद्धनाथ माविका लेखापाल जोशीले कक्षा १० मा अध्ययनरत एक छात्रामाथि यौन दुर्व्यवहार गरेको आरोप लागेपछि सोही विद्यालयका विद्यार्थी, अभिभावक र स्थानीय आन्दोलित भएका थिए । त्यस क्रममा प्रहरीले लेखापाल जोशीलाई नियन्त्रणमा लिएकै अवस्थामा उक्त भिडले विद्यालय हाताभित्रै जोशीमाथि आक्रमण गरेको थियो ।
निर्घात कुटपिटबाट घाइते लेखापाल जोशीको अहिले पनि धनगढीस्थित निसर्ग अस्पतालको सघन उपचार कक्षमा उपचार भइरहेको छ । लेखापाल जोशीको परिवारले दिएको किटानीका आधारमा कुटपिटमा संलग्न ७ जनालाई पक्राउ गरी आवश्यक अनुसन्धान गरिरहेको कञ्चनपुर प्रहरीले जनाएको छ ।
जिल्ला प्रहरी कार्यालयमा लेखापाल जोशीविरुद्ध पनि छात्राको परिवारले जाहेरी दिएको छ । ती दुबै जाहेरी दर्ता गरी अनुसन्धान अघि बढाएको जिल्ला प्रहरी कार्यालय कञ्चनपुरले जनाएको छ ।
