दार्चुला - केही दिनयता दार्चुला सदरमुकाम खलंगाको आकाशमा भारतीय हेलिकप्टरले फन्को लगाइरहेका छ । नेपाली आकाशमा भारतीय पक्षले अनधिकृत रुपमा हेलिकप्टर उडाइरहेको पाइएको हो ।
‘५-६ दिन भयो, भारतीय हेलिकप्टर खलंगाको आकाशमा फन्को लगाएर जान्छ,’ स्थानीय धन सिंह कार्कीले भने, ‘सरकारी अड्डामाथि हेलिकप्टरले फन्को लगाउँछ ।’
भारतीय पक्षले नेपाली आकाशमा हेलिकप्टर उडाउनका लागि नेपाली प्रशासनसँग कुनै समन्वय गरेको छैन् । भारतीय पक्षले नेपाली आकाश प्रयोगका लागि कुनै औपचारिक जानकारी नगराएको दार्चुलाका सहायक प्रमुख जिल्ला अधिकारी प्रदीपसिंह धामी बताए ।
भारतीय सीमा सुरक्षा बल (एसएसबी)ले दुई वर्षअघि तुइन काट्दा महाकाली नदीमा बेपत्ता भएका व्यास गाउँपालिका–२ का जयसिंह धामीको खोजीका लागि नेपाली प्रशासनलाई नदीमा ड्रोन समेत चलाउन दिएको थिएन् ।
दार्चुलाको सीमा क्षेत्रमा भारतीय पक्षले पटक पटक बलमिच्याँइ गर्दै आएको छ । यसअघि पनि धेरै पटक नेपाली प्रशासनसँग समन्वय नै नगरेर भारतले दार्चुलाको आकाशमा हेलिकप्टर उडाएको थियो ।
बिना जानकारी नेपाली आकाशमा भारतीय पक्षले हेलिकप्टर उडाएपछि दार्चुला प्रशासनले लिखित आपत्ति जनाएको छ। भारतीय प्रशासनलाई पत्राचार गर्दै अनुमतिबिना नेपाली आकाशमा हेलिकप्टर किन उडाएको भनेर जवाफ मागेको दार्चुलाका प्रमुख जिल्ला अधिकारी किरण जोशीले बताइन् ।
२० साउनमा भारतीय प्रशासनलाई पत्राचार गरेपनि अहिलेसम्म त्यसको जवाफ नआएको उनले बताइन्। ‘हामीले डीएमलाई पत्राचार गरेका छौँ, हिजो आइतबार बिदा थियो, आज पनि त्यहाँबाट जवाफ आएको छैन,’ उनले भनिन्।
नेपाली आकाशमा हेलिकप्टर उडाएको घटना बारे गृह मन्त्रालयलाई समेत जानकारी गराइएको उनको भनाइ छ ।
