काठमाडौं - आईसीसी एक दिवसीय विश्वकप छनोट क्रिकेटको निर्णायक खेलमा नेदरल्याण्ड्सविरुद्ध नेपाल १६७ रनमै अलआउट भएको छ।
जिम्बावेको हरारेमा टस हारेर पहिला ब्याटिङमा तानिएको नेपाल ४४ दशमलव ३ ओभरमा १ सय ६७ रनमा समेटिएको हो। खराब ब्याटिङबाट गुज्रिएको नेपालका लागि कप्तान रोहित पौडेलले सर्वाधिक ३३ रनको योगदान गरे।
सन्दीप लामिछानेल र कुशल भुर्तेलले समान २७/२७, भीम सार्की २२, गुल्सन झा १५, दीपेन्द्रसिंह ऐरी १४, कुशल मल्ल १२, आरिफ शेख ६ रनमा आउट हुँदा करण केसी एक रन र आसिफ शेख शून्यमा पेभिलियन फर्किए।
नेपाललाई सस्तैमा समेट्न नेदरल्याण्ड्सका भान बिकले सर्वाधिक ४, डि लिड र विक्रमजित सिंहले २/२ तथा क्लेटन फ्लोएडले एक विकेट लिए।
समूह ‘ए’ को चौथो स्थानमा रहेको नेपाललाई विश्वकपमा छनोटको सम्भावना कायम राख्न आजको खेल जित्नै पर्नै दबाब छ । १ सय ६८ रनको विजयी लक्ष्यसहित नेदरल्याण्ड्सले केहीबेरमा जवाफी ब्याटिङ गर्नेछ।
नेदरल्याण्ड्स दुई खेलमा २ अंक जोडेर तेस्रो स्थानमा छ। आजको खेल जिते नेपाल तेस्रो स्थानमा उक्लिेनछ । तर नेदरल्याण्ड्सले आफ्नो अन्तिम खेल जिते तेस्रो टोलीको टुंगो नेट रनरेटको आधारमा लाग्नेछ ।
विश्वकप छनोटअन्तर्गत पहिलो खेलमा घरेलु टोली जिम्बावेसँग ८ विकेटले पराजित भएको नेपालले दोस्रो खेलमा अमेरिकालाई ६ विकेटले हराएको थियो।आफ्नो तेस्रो खेलमा नेपाल बिहीबार पूर्वविश्वविजेता वेस्टइण्डिजसँग १०१ रनले पराजित भएको थियो ।
