बैतडी - बैतडीसहित सुदूरपश्चिम प्रदेशमा हालसम्म २२ लाखभन्दा बढीले कोरोनाविरुद्धको पूर्ण खोप लगाएका छन्।
प्रदेशका ९ वटै जिल्लामा गरी हालसम्म पूर्ण मात्रा लगाउनेको संख्या कूल २२ लाख ३३ हजार ८३१ पुगेको सुदूरपश्चिम प्रदेश स्वास्थ्य निर्देशनालयले जनाएको छ। पूर्ण मात्रा लगाउनेमा सबैभन्दा बढी कैलालीका ७ लाख ३२ हजार ७८९ जना छन्।
सबैभन्दा थोरै दार्चुलामा १ लाख १४ हजार ६२८ जनाले कोरोनाविरुद्धको पूर्ण खोप लगाएका सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले जानकारी दिए।
कञ्चनपुरमा ४ लाख ३९ हजार १६८, बैतडीमा २ लाख ११ हजार ६५२, अछाममा १ लाख ८३ हजार ६०२, डोटीमा १ लाख ६१ हजार १३८, बझाङमा १ लाख ३७ हजार ६११, डडेल्धुरामा १ लाख २७ हजार ७२५ र बाजुरामा १ लाख २५ हजार ४६८ जनाले कोरोनाविरुद्धको पूर्ण खोप लगाएका छन्।
प्रदेशमा हालसम्म कोरोना भाइरसविरुद्धको तेस्रो तथा बुस्टर डोजको पहिलो मात्रा लगाउनेको सङ्ख्या भने १० लाख १५ हजार ३७ रहेको छ। प्रदेशमा कोरोना भाइरसविरुद्धको चौथो तथा बुस्टर डोजको दोस्रो मात्रा लगाउनेको संख्या भने २९ हजार ८५६ रहेको निर्देशनालयले जनाएको छ।
बैतडीमा भने एकजनाले पनि कोरोना भाइरसविरुद्धको चौथो तथा बुस्टर डोजको दोस्रो मात्रा नलगाएको स्वास्थ्य कार्यालयका सूचना अधिकारी विपिन लेखकले जानकारी दिए। जिल्लामा केही दिनमै चौथो मात्रा दिइने अभियान सञ्चालन गरिने लेखकको भनाइ छ।
सुदूरपश्चिममा कोभिसिल्ड, अस्ट्राजेनेका, भेरोसेल, जोन्सन एन्ड जोन्सन, फाइजर, मोडर्ना खोप लगाइएको हो। प्रदेशमा हाल पनि कोरोनाविरुद्धको खोप लगाउने अभियान जारी रहेकाले खोप लगाउन बाँकी सबैलाई खोप लगाउन आग्रह गरिएको छ।
सुदूरपश्चिममा विसं २०७७ माघ १४ गतेदेखि कोरोना भाइरसविरुद्धको अभियान सुरु गरिएको थियो। प्रदेशसमा हालसम्म ६ लाख ४६ हजार ७०३ जनाको कोरोना परीक्षण गरिएको छ जसमध्ये ६१ हजार ९५५ जनामा संक्रमण भइसकेको छ। संक्रमणकै कारण यस प्रदेशमा ६३५ जनाको ज्यान गइसकेको छ।
भारतसँग सीमा जोडिएको यस प्रदेशमा दैनिक कोरोना सङ्क्रमण बढ्दै छ। सङ्क्रमण देखिने अधिकांश भारतबाट फर्किएका यहाँ जोखिम बढ्दै गएको छ।
प्रदेशका सबै सीमानाकाहरुमा हेल्थ डेस्क स्थापना गरिएको र कोरोनाको अनिवार्य परीक्षण गराएर मात्रै भित्रिन दिइएको छ। सङ्क्रमणको जोखिम बढ्दै गएकाले जनस्वास्थ्यका मापदण्ड अनिवार्य रुपमा पालना गर्न निर्देशनालयले आग्रह गरेको छ। - रासस
