दार्चुला - मा बाढी र पहिरोपछि थुनिएको महाकाली नदीमा पानी बग्न थालेको छ । शुक्रबार रातिको पानीले महाकाली नदी थुनिएर ताल बनेको थियो ।
शनिबार बेलुकादेखि पानी आफैँ बग्न थालेको दार्चुलाका सहायक प्रमुख जिल्ला अधिकारी हेमन्ती साउँदले जानकारी दिइन् । त्यहाँ दुहुँ र महाकाली नगरपालिका जोड्ने पक्की पुल बाढीले बगाएको छ । महाकालीका ४० भन्दा धेरै घर जोखिममा परेका छन् । त्यस्तै लास्कु खोलामा आएको बाढीबाट एउटा झोलुङ्गे पुल बगेको छ ।
दुहुँ र व्यास क्षेत्रबाट सदरमुकाम खलङ्गा आउने–जाने बाटो बन्द भएको छ ।अहिलेसम्म बाढीरपहिरोमा परि ५ जनाले ज्यान गुमाएका छन् । बेपत्ता भएका १० जनाको अवस्था अझै थाहा हुन सकेको छैन । उनीहरुको खोजी भइरहेको छ ।
घटनामा घाइते भएका ८ जनाको जिल्ला अस्पतालमा उपचार भइरहेको सहायक प्रमुख जिल्ला अधिकारी साउदले बताइन् । महाकाली नदी थुनिएपछि जोखिममा परेका स्थानीय बासिन्दाले शनिबार तत्काल उद्धार गर्न प्रशासनसँग माग राखेका थिए ।
दार्चुला सदरमुकाम खलङ्गाको बंगाबगड क्षेत्र विद्युत र सञ्चारबाट अलग भएको हो। लास्कु खोला र महाकाली नदीमा आएको बाढीले विद्युत र सञ्चार अवरुद्व भएको छ । महाकाली ३ मा रहेको दशरथ आधारभूत विद्यालयसमेत बगाएको छ । बाढीले महाकाली ३ मा रहेको डुङ्ग्री विद्युत् पावर हाउसमा पनि पूर्णरुपले क्षति पुर्याएको छ । सदरमुकाम खलङ्गामा खानेपानीको अभाव भएको छ ।
लास्कु जलाधारमा ठूलो पानी परेपछि खसेको पहिरोले नदी थुनिएर वा ग्रेगान बहाव भइ कटानले ठूलो बाढीको रुप लिएको हुनसक्ने अनुमान छ । यस्तो घटनाको पूर्वानुमान गर्न कठिन हुने बाढी पूर्वानुमान महाशाखाले जनाएको छ ।
बाढीरपहिरो प्रभावित क्षेत्रमा राहत सामग्री बोकेर सेनाको हेलिकप्टर गएको छ । उद्योग तथा वाणिज्यमन्त्री दीलेन्द्रप्रसाद बडु, सुदूरपश्चिम प्रदेशका आन्तरिक मामिला तथा कानुनमन्त्री रणबहादुर रावल, सुदूरपश्चिम प्रदेशका वन वातावरण उद्योग तथा पर्यटनमन्त्री मानबहादुर धामीसहितको टोली पनि सदरमुकाम खलङ्गा पुगेको छ ।
घटनापछि शनिबार गृहमन्त्री बालकृष्ण खाणले तत्काल उद्धार तथा राहतमा जुट्न मातहतका निकायलाई निर्देशन समेत दिएका थिए ।
