डोटी - जिल्लाका अधिकांश उम्मेदवारले हालसम्म पनि निर्वाचन खर्च विवरण बुझाएका छैनन् ।निर्वाचनको अन्तिम नतिजा आएको ३० दिनभित्र खर्च विवरण निर्वाचन कार्यालयमा बुझाउनुपर्ने प्रावधान छ ।तर, अधिकांशले अहिलेसम्म खर्च विवरण नबुझाएको जिल्ला निर्वाचन कार्यालय डोटीले जनाएको छ ।
गएको वैशाख ३० गते सम्पन्न स्थानीय तह निर्वाचनमा जिल्लामा कुल ३४३ पदका लागि १०५० जनाले प्रतिस्पर्धा गरेका थिए । ती उम्मेदवारमध्ये २५६ जनाले मात्रै खर्च विवरण पेस गरेको जिल्ला निर्वाचन कार्यालय डोटीका सूचना अधिकारी दलबहादुर मलासीले बताए ।
‘ऐनले निर्वाचनको परिणाम घोषणा भएको मितिले ३० दिनभित्र निर्वाचन खर्च विवरण तोकिएको ढाँचामा पेस गर्ने भनेको छ’ मलासी भन्छन् ‘तर आजसम्म २५६ जनाले मात्रै विवरण बुझाएका छन् ।’
जिल्लाका दिपायल सिलगढी नगरपालिका, जोरायल गाउँपालिका, बोगटान फुड्सिल गाउँपालिका, आदर्श गाउँपालिका र सायल गाउँपालिकाका निर्वाचित प्रमुख/अध्यक्षले समेत निर्वाचन खर्च विवरण नबुझाएको कार्यालयको तथ्याङ्कले देखाउँछ ।
निर्वाचन कार्यालयको तथ्याङ्क अनुसार निर्वाचित उम्मेदवारहरुले समेत तोकिएको समयमा निर्वाचन खर्च विवरण बुझाएका छैनन् ।जिल्लाका विभिन्न स्थानीय तहमार्फत सबै उम्मेदवारहरुलाई तोकिएको समयमा निर्वाचन खर्च विवरण बुुझाउन ध्यानाकर्षण गराएपनि हालसम्म अधिकांश उम्मेदवारहरुले खर्च विवरण नबुुझाएको जिल्ला निर्वाचन कार्यालय डोटीले जनाएको छ ।
सबै उम्मेदवारहरुलाई स्थानीय तह मार्फत निर्वाचन खर्च विवरण बुुझाउन ताकेता गर्दा नबुुझाएपछि हालसम्म प्राप्त विवरण निर्वाचन आयोगमा पठाईने जिल्ला निर्वाचन अधिकारी करुणाकर पाण्डेयले बताए ।
स्थानीय तह निर्वाचन ऐन, २०७३ को दफा ६४ (४) अनुसार निर्वाचन खर्चको विवरण दल, उम्मेदवार वा तिनका प्रतिनिधिले निर्वाचन परिणाम घोषणा भएको मितिले ३० दिनभित्र आयोगले तोकेको कार्यालयसमक्ष बुझाउनुपर्ने व्यवस्था छ ।
