सुदूरपश्चिममा ल्याएको बजेटको पक्षमा उभिन सांसदहरुलाई माओवादीद्धारा आग्रह

राजनीति

गृहपृष्ठ
राजनीति
सुदूरपश्चिममा ल्याएको बजेटको पक्षमा उभिन सांसदहरुलाई माओवादीद्धारा आग्रह

सुदूरपश्चिममा ल्याएको बजेटको पक्षमा उभिन सांसदहरुलाई माओवादीद्धारा आग्रह

शनिबार, असार १८, २०७९ गोदावरी न्युज

धनगढी - नेकपा माओवादी केन्द्र सुदूरपश्चिम प्रदेश संसदीय दलको धनगढीका आज बसेको बैठकले सरकारले ल्याएको बजेटको पक्षमा उभिन सांसदहरुलाई आग्रह गरेको छ । शनिबार मुख्यमन्त्री समेत रहेका संसदीय दलका नेता त्रिलोचन भट्टको अध्यक्षतामा मुख्यमन्त्री तथा मन्त्रिपरिषद्को कार्यालयमा बसेको संसदीय दलको बैठकले बजेटको पक्षमा उभिने निर्णय गर्दै ह्वीप जारी गरेको छ ।

आज बसेको दलको बैठकले बजेट पास गर्ने निर्णय गर्दै सबै माननीयज्यूहरुलाई निर्देशन दिएको उद्योग पर्यटन वन तथा वातावरण मन्त्री मानबहादुर धामीले बताए ।’ बजेटमा भएका सानातिनना त्रुटी कार्यान्वयनका क्रममा सम्बन्धित मन्त्रालयबाटै सच्याउने कुरा भएको मन्त्री धामीले बताए । बैठकमा सहभागी भएका प्रदेशसभा सदस्यहरुले बजेटमा त्रुटी भएकाले संशोधन गर्नुपर्ने आफ्नो धारणा व्यक्त गरेका थिए । तर मुख्यमन्त्री भट्टले कार्यान्वयनका क्रममा त्रुटी सच्याउने प्रतिबद्धता व्यक्त गरेपछि उनीहरु बजेट पारित गर्न सहमत भएका मन्त्री धामीले जानकारी दिए ।

असार १ गते प्रदेशका आर्थिक मामिला मन्त्री प्रकाशबहादुर रावलले प्रदेशसभामा प्रस्तुत गरेको अगामी आर्थिक वर्ष २०७९÷८० को बजेट संशोधनको माग गर्दै सत्तारुढ दलकै सांसदहरुले प्रदेशसभा चल्न नदिने चेतावनी दिएपछि बैठक बस्न सकेको छैन । अहिलेसम्म बजेट छलफलका लागि बोलाइएको प्रदेशसभा बैठक तीन पटक स्थगित भइसकेको छ ।

माओवादी केन्द्रको संसदीय दलको बैठकमा सरकार फेरबदलबारे भइरहेको चर्चाका विषयमा समेत कुराकानी भएको थियो । तर गठबन्धनमा रहेका दलको शीर्ष नेतृत्वले टुंग्याउने विषय भन्दै धेरै छलफल नभएको मन्त्री धामीले बताए ।

प्रकाशित मिति: शनिबार, असार १८, २०७९ १६:२९