भजनीः खुला सीमानाकामा प्रहरीको निगरानीमा कमी भएका कारण चोरी–तस्करीका घटना बढेपछि सत्ती भन्सार कार्यालयको राजस्व सङ्कलनमा कमी आएको छ ।
कोरोनाको दोस्रो लहरका कारण जनजीवन प्रभावित भएको अवस्थामा सीमानाकामा गरिएको कडाइका कारण चालु आर्थिक वर्षको दुई महिनामा लक्ष्यभन्दा बढी राजस्व सङ्कलन गरेको भन्सार कार्यालयले सीमानाकामा आवागमन सहज भएसँगै चोरी–तस्करीका घटना बढेपछि भन्सार कार्यालयको राजस्व सङ्कलनमा कमी आएको हो।
खुला सीमाका कारण आवागमनमा सहज हुन थालेपछि चोरी–तस्करीबाट सामानको आयात हुन थालेपछि राजस्व सङ्कलनमा कमी आएको भन्सार कार्यालय सत्तीका प्रमुख विमलकुमार शाहले बताए । “साउन, भदौतिर मोहोना नदीबाट सहजरूपमा आवतजावत हुँदैन ।
त्यस समयमा भन्सारबाट सामान भित्रिने भएका कारण चोरी–तस्करी कम हुन्छ र राजस्वमा वृद्धि भएको देखिन्छ”, कार्यालय प्रमुख शाहले भने, “अहिले नदीबाट सहज आवतजावत हुनु र सीमा पूर्णरूपमा खुला भएकै कारण पनि राजस्व सङ्कलनमा निकै कमी आएको छ ।”
चोरी–तस्करीका घटना बढ्दै जानुको प्रमख कारण सीमानाकामा रहेको सशस्त्र प्रहरीको निगरानी कमी भएको बताउँदै प्रहरीको काम नै चोरी–तस्करी कम गर्ने भए पनि त्यसमा प्रहरीको चासो कम भएको उनले बताए ।
सत्ती भन्सार कार्यालयले पुस महिनामा लक्ष्यभन्दा निकै कम राजस्व सङ्कलन गरेको छ। भन्सार कार्यालयले पुसमा एक करोड ७७ लाख ६६ हजार राजस्व सङ्कलन गर्नुपर्ने लक्ष्य रहेकामा ६९ लाख ५४ हजार ४१५ मात्रै सङ्कलन भएको छ ।
भन्सार कार्यालयले असोजदेखि लक्ष्यअनुसारको राजस्व सङ्कलन गर्न सकेको छैन।असोजामा एक करोड ६५ लाख ५० हजार, कात्तिकमा एक करोड ७३ लाख ७६ हजार र मङ्सिरमा एक करोड ७६ लाख ५२ हजार राजस्व उठाउने लक्ष्य राखेकामा असोजमा एक करोड २० लाख ८३ हजार १२, कात्तिकमा एक करोड नौ लाख पाँच हजार ४४७ र मङ्सिरमा एक करोड १० लाख ९६ हजार १९४ राजस्व सङ्कलन गरेको छ। प्रतिशतमा पनि असोजमा ७३, कात्तिकमा ६२ दशमलव ७६, मङ्सिरमा ६४ र पुसमा ३९ प्रतिशतमात्रै राजस्व सङ्कलन भएको छ ।
चालु आवको साउन र भदौमा भने भन्सारमा लक्ष्यभन्दा बढी राजस्व सङ्कलन भएको भन्सार कार्यालयका प्रमुख शाह बताउछन्। उनका अनुसार साउनमा एक करोड ७२ लाख २० हजार ८८५ र भदौमा एक करोड ९० लाख नौ हजार ७३४ राजस्व सङ्कलन भएको थियो। साउन र भदौमा एक करोड २२ लाख ५४ हजार र एक करोड ६५ लाख ९७ हजार राजस्व सङ्कलनको लक्ष्य थियो।
२० करोड ५८ लाख ६१ हजार राजस्व सङ्कलनको लक्ष्य लिएको सत्ती भन्सार कार्यालयले छ महिनाको अवधिमा सात करोड ७२ लाख ६९ हजार ६८७ मात्रै सङ्कलन गरेको कार्यालय प्रमुख शाह बताउँछन् ।
सीमानाकामा भएको कडाइका कारण गत आवमा भन्सारले लक्ष्यभन्दा ११ प्रतिशत बढी राजस्व सङ्कलन गरेको थियो । १४ करोड २३ लाख ४८ हजार लक्ष्य रहेकामा भन्सारले १५ करोड ८३ लाख सात हजार ९७३ राजस्व सङ्कलन गरेकोे थियो।
रासस
