भारत - कोरोना भाइरस महामारीको दोस्रो लहरबाट प्रभावित भारतमा विगत २४ घण्टाको अवधिमा सङ्क्रमितको सङ्ख्यामा व्यापक गिरावट आएको छ ।
गत मे ९ तारिखमा एकै दिन चार लाखभन्दा बढी संक्रमित फेला पारिएकामा विगत २४ घण्टामा त्यो सङ्ख्या घटेर एक लाख ६५ हजार मात्र देखिएको भारतीय स्वास्थ्य तथा परिवार कल्याण मन्त्रालयले जनाएको छ ।
यो सहित भारतमा आइतबारसम्म कूल सङ्क्रमितको सङ्ख्या दुई करोड ७९ लाख पुगेको छ । र सक्रिय सङ्क्रमितको सङ्ख्या भारतमा अझै २१ लाख १४ हजार रहेको छ । विगत २४ घण्टामा एक लाख १४ हजारले सक्रिय सङ्क्रमितको सङ्ख्यामा कमी आएको पनि मन्त्रालयले जनाएको छ ।
भारतमा हालसम्म दुई करोड ५५ लाख व्यक्ति कोभिड–१९ बाट सङ्क्रमणमुक्त भएका छन् ।तर भारतमा कोभिड–१९ को सङ्क्रमणबाट भइरहेको दैनिक मृत्यु दरमा सामान्य गिरावट आए पनि तीव्र सुधार हुन सकेको छैन ।मन्त्रालयका अनुसार भारतमा पछिल्लो २४ घण्टामा तीन हजार ४६० जनाको ज्यान गएको छ । योसहित भारतमा कूल मृतकको सङ्ख्या तीन लाख २५ हजार ९७२ पुगिसकेको छ ।
कोरोना भाइरस महामारीबाट आम जनतालाई सुरक्षित राख्न गत जनवरीदेखि नै खोप अभियान सञ्चालन गरेको भारतले देशभर हालसम्म २१ करोड २० लाख डोज खोप लगाएको छ । शनिबार एकै दिन भारतमा ३० लाख भन्दा बढी व्यक्तिलाई खोप दिइएको स्वास्थ्य मन्त्रालयले जनाएको छ ।
भारतले हाल १८ वर्षभन्दा माथिको उमेर समूहका सबै व्यक्तिलाई खोप दिइरहेको छ । तर खोपको माग तीव्र भए पनि आपूर्ति त्यस अनुरूप हुन नसकेको भारतीय सञ्चार माध्यमहरूले जनाएका छन् ।
यसैबीच, भारत सरकारले देशभर कोभिड–१९ को परीक्षणलाई तीव्र बनाएको छ । शनिवारसम्म भारतमा ३४ करोड ३२ लाख नमुना परीक्षण गरिएको छ जसमध्ये शनिबार एकै दिन २० लाख ६३ हजार नमुना परीक्षण गरिएको भारतीय स्वास्थ्य अनुसन्धान परिषद्ले जनाएको छ ।
भारतमा हाल तीन किसिमका खोप प्रयोगमा ल्याइएको छ । भारत सरकारले सेरम इन्स्टिच्युटले उत्पादन गरिरहेको कोभिसिल्ड, कोभ्याक्सिन र रसिया–निर्मित स्पुतनिक भी खोपलाई प्रयोगका लागि अनुमति दिएको छ ।
कतिपय राज्यमा भारत सरकारले निःशुल्क खोपको व्यवस्था गर्नुका साथै निजी संस्थाबाट खोप बिक्रीका लागि अनुमति दिएको छ । रासस
