काठमाडौं- साल्ट ट्रेडिङ कर्पोरेसनले सेयरधनीलाई २५ प्रतिशत बोनस सेयर र १० प्रतिशत लाभांश दिने भएको छ। बोनस र लाभांशको प्रस्ताव कर्पोरेसनको ५३ औं साधारण सभाले गरेको हो।
गत आर्थिक वर्षको वासलात, नाफा नोक्सान हिसाब, नगद प्रवाह विवरण तथा विभिन्न क्रियाकलापहरुका बारेमा छलफल गर्दै सभाले वार्षिक प्रतिवेदन पारित गरेको कम्पनीले जनाएको छ।
कम्पनीले गरिरहेको नुन, चिनी र रासायनिक मल लगायतको व्यापारिक कारोबार सन्तोषजनक रहेको र विभिन्न क्षेत्रको लगानी उपलब्धिमूलक रहेको साधारणसभाको निष्कर्ष छ।
गत आर्थिक वर्ष कम्पनीले ८ अर्ब २५ करोड रुपैयाँको कारोबार गर्दै ७३ करोड १४ लाख रुपैयाँ मुनाफा आर्जन गरेको छ। कर्पोरेसनले अंगालेको व्यापार विविधिकरणको नीति अनुरुप थप चुक्ता पुँजीको आवश्यकता पर्ने भन्दै गत वर्षको मुनाफाबाट सेयरधनीहरुलाई १० प्रतिशत नगद लाभांश वापत १ करोड ५३ लाख ५७ हजार ५८० रुपैयाँ र ३ करोड ८३ लाख ९३ हजार ९५० रुपैयाँ बराबरको २५ प्रतिशत बोनस सेयर वितरण गर्ने प्रस्तावलाई सभाले स्वीकृत गरेको हो।
विगत वर्षमा कर्पोरेसनले आयात गरेको चिनीमध्ये २५०० मेट्रिक टन भन्सार विन्दुमा आइपुग्ने समयमा नेपाल सरकारबाट विदेशी चिनीको आयातमा प्रतिबन्ध लगाउने निर्णय गरेको थियो। त्यसले धेरै महिनासम्म चिनी भन्सारमा रोकिएका कारण कारोबारमा कमी मात्रै आएको थिएन, डेमरेज चार्ज धेरै तिर्नु परेकाले आर्थिक भार पर्न गएको कम्पनीले जारी गरेको विज्ञप्तिमा उल्लेख छ।
कम्पनीले भविष्यमा राष्ट्रिय तथा अन्तर्राष्ट्रिय बजारमा आफूलाई स्थापित गर्न सृजनशील कारोबारको खोजी गर्दै व्यापार विविधिकरणतर्फ उन्मुख हुने जनाएको छ।
व्यापार विविधिकरणकै गि कम्पनीले एकीकृत नमूना वस्ती विकास गर्न आफ्नो सहायक कम्पनी उपहार हाउजिङ्ग कम्पनी लिमिटेड मार्फत चन्द्रागिरी नगरपालिका स्थित आफ्नै जग्गामा ८ वटा भूकम्प प्रतिरोधी भवन निर्माण गरि बिक्री वितरण शुरु गरेको पनि जनाएको छ।
