लण्डन - विश्वप्रसिद्ध फुटबलर डिएगो म्याराडोनाको ६० वर्षको उमेरमा निधन भएको छ । केही समययता अस्वस्थ रहँदै आएका म्याराडोनाको झण्डै एक महिनाअघि शल्याक्रिया गरिएको थियो ।तर यही बुधबार अचानक हृदयघातका कारण घरमै निधन भएको डेलीमेलले जनाएको छ । अन्तर्राष्ट्रिय मिडियाका अनुसार उनी मस्तिष्क सम्बन्धी समस्यासँग जुधिरहेका थिए । र तीन साताअघि मात्रै उनको मस्तिष्कको शल्याक्रिया गरिएको थियो ।
म्याराडोना विश्वभर सर्वकालिन चर्चित फुटबलर हुँदा हुँदै विवादित छवि भएका अर्जेन्टिनी खेलाडी थिए । लागूऔषध सेवन तथा दुर्व्यवहारका कारण उनी बारम्बार चर्चा र विवादमा आउने गरेका थिए । उनका वकिलले मिडियाहरुलाई दिएको सूचना अनुसार उनको घरमै हृदयघातका कारण निधन भएको हो । शल्याक्रिया गरेको ३ हप्तापछि निधन भएको बताइएको छ ।
म्याराडोनाको कप्तानीमा अर्जेन्टिनाले १९८६ को विश्वकप जितेको थियो । त्यसबेला विश्व फुटबलमा दबदबा कायम गरेको इङ्ल्याण्डलाई अर्जेन्टिनाले हराएको थियो । त्यसभन्दा पनि प्रमुख कुरा इङ्ल्याण्डसँग अर्जेन्टिनाले युद्ध हारेको लगत्तै उक्त विश्वकप भएको थियो । जुन जितलाई म्याराडोनाले फकल्याण्ड टापु हार्दाको इङ्ल्याण्डसँग बदलाको रुपमा पनि अर्थ्याएका थिए ।
यद्यपि म्याराडोनाले हातले गोल हानेको कुरा जितको घोषणापछि मात्रै थाहा भयो । जुन गोललाई म्याराडोनाले 'ईश्वरको हात' भनिदिए । जुन घटना र प्रसंग अझै विश्व फुटबल इतिहासमा स्मरणीय मानिन्छ ।
त्यसपछिका केही वर्षमा अर्जेन्टिनी फुटबलको उचाइ र प्रभाव बढ्नुमा म्याराडोनाको महत्वपूर्ण भूमिका मानिन्छ । तर पनि उनी बारम्बार खेलमा प्रतिबन्धित हुनुका साथै अत्याधिक लागूऔषध सेवनका कारण सुधारगृहमा समेत बस्नु परेको थियो ।
१९९९ र २००० मा पनि उनी मुटु सम्बन्धी समस्याका कारण अस्पताल भर्ना हुनु परेको थियो । २००४ मा फेरि स्वासप्रस्वास तथा लागूऔषध सेवनबाट उत्पन्न स्वास्थ्य समस्याका कारण अस्पतालमा उनको उपचार गरियो ।
पछिल्लो पटक २०१० को विश्वकपमा म्याराडोनाले राष्ट्रिय टीमको व्यवस्थापन गर्ने अवसर पाएका थिए । त्यसबेला उनले अर्जेन्टिनाले विश्वकप जितेमा नांगै हिँड्ने अभिव्यक्ति दिएका थिए । तर दक्षिण अफ्रिकामा भएको उक्त विश्वकपमा अर्जेन्टिना सेमी फाइनलमा पनि प्रवेश गर्न पाएन ।
म्याराडोनाका वकिलका अनुसार उनी ८ दिनको अस्पतालको उपचारपछि नोभेम्बर ११ मा डिस्चार्ज भएका थिए । बुधबार उनको निधनको खबर बेलायती मिडियाले दिएका छन् । उनको निधनको खबरसँगै थुप्रै प्रसंशकहरुले सामाजिक सञ्जालमार्फत दुख व्यक्त गरेका छन् ।
